Қарақалпақ мәмлекетлик университетинде онлайн видеоконференция өткерилди

By | 11.04.2020

Бердақ атындағы Қарақалпақ мәмлекетлик университетинде  2020-жыл 10-март күни «Арал бойы халықлары турмысы абаданлығын асырыўда инвестициялық тартымлылықтың әҳмийети» темасындағы республикалық илимий-әмелий видеоконференция өткерилди.

Видеоконференция Өзбекстан Республикасы Министрлер Кабинетиниң 2020-жыл 7-февралдағы №56-ф санлы фармойиши 2020-жылда республика көлеминде өткерилетуғын илимий ҳәм илимий-техникалық ис-илажлар режесине киритилген.

Онлайн видеоконференцияны қарақалпақ мәмлекетлик университети ректоры А.Реймов ашып берди. Видеоконференцияға Самарқанд мәмлекетлик университети, Ургенч мәмлекетлик университети, Нөкис мәмлекетлик педагогикалық институты ҳәм Қарақалпақ мәмлекетлик университетиниң «Экономика» факультетиниң профессор-оқытыўшылары қатнасты. Видеоконференция Zoom программасында өткерилди.

Республика көлеминде өткерилген илимий-әмелий видеоконференцияның илимий бағдары Арал бойы халықлары турмысы абаданлығын асырыў, халықтың жумыс пенен бәнтлигин тәмийинлеў, бар болған ислеп шығарыў объектлериниң турақлы ислеўине ерисиў ҳәм бүгингидей күтилмеген жағдайларда да машқалаларды жумсатыў, бул аймақта жасаўшы халықтың абаданлығын, турақлы жумыс пенен бәнтлигин тәмийинлеў мәселелерин шешиў есапланады. Видеоконференцияның мақсети ҳам ўазыйпалары-илим ҳеш қашан тоқтап қалмаслығы зәрүр ҳам сол тийкарында республикамызда жасаўшы халықтың турмыс дәрежесин жақсылаў, оладың жумыс пенен бәнтлигин тәмийинлеў, Қарақалпақстан Республикасы ҳәм республикамыздың басқа аймақларында бар болған ислеп шығарыў структураларын оптималластырыў машқалаларын шешиў мәселелерин тезлетиўдиң экономикалық тәреплерине илимий жуўмақ ҳам әмелий усыныслар бериўден ибарат болып есапланады.

Видеоконференция даўамында бир қанша илимий-теориялық, методологиялық ҳәм әмелий әҳмийетке ийе усыныслар берилди. Булар ҳәзирги ўақытта системаластырылып тийисли формада рәсмийлестирилмекте. Усыныслар қурамында Өзбекстан Республикасы Нызамшылық палатасы, Министрлер Кабинетине, бир қанша министрлик ҳәм ведомостваларға, жоқары оқыў орынларына, кәрханаларға бағдарланған усыныслар орын алған.

 

К.Қудияров

«Экономика» факультети деканының

Илимий ислер ҳәм инновациялар бойынша орынбасары