ҚМУДА ХАЛЫҚАРАЛЫҚ ИЛИМИЙ-ӘМЕЛИЙ ӘНЖУМАН БОЛЫП ӨТТИ

By | 13.03.2020

Усы жылдың 13-март күни Бердақ атындағы Қарақалпақ мәмлекетлик университетинде Өзбекстан Республикасы Президентиниң 2018-жыл 5-июнь күнги «Жоқары билимлендириў мәкемелеринде билим бериў сапасын арттырыў ҳәм олардың мәмлекетте әмелге асырылып атырған кең көлемли реформаларда белсене қатнасыўын тәмийинлеў бойынша қосымша ис-илажлар ҳаққында»ғы қарары ҳәм ҳүкиметимиз тәрепинен республикамыздың экономикасын еле де раўажландырыў ҳәм халықаралық қатнасықларды жетилистириў бойынша илажларын илимий-әмелий тәрептен қоллап-қуўатлаў мақсетинде Қарақалпақ мәмлекетлик университети ҳәм Россияның Кубан мәмлекетлик университети, сондай-ақ, Түркияның Ататүрк университети, Қазақстанның Қазақ миллий аграр университетлери менен биргеликте онлайн тәризде «Регионлар экономикасында инновациялық-инвестициялық тартымлылықты арттырыў, тармақларды модернизациялаў ҳәм диверсификациялаў: машқалалар ҳәм перспективалар» атамасында халықаралық илимий-әмелий конференция болып өтти.

Әнжуманды ҚМУ ректоры, профессор А.Реймов ашып берди.

Дүнья илимий жәмийетшилигиниң регионаллық машқалаларын биргеликте шешиўге болған итибары ҳәм қызығыўшылығын есапқа алған ҳалда, бул халықаралық илимий-әмелий конференция усы салалар бойынша алымлар ҳәм илимий излениўшилердиң билими ҳәм тәжирийбелерин алмасыўы, келешектеги перспективалы шерикликти жолға қойыў, мәпдар тәреплердиң биргеликтеги қоспа жойбарларды ислеўине қолайлы ҳәм дослық орталық жаратып бериўди мақсет еткен.

Әнжуманда Түркия, Россия, Қазақстан ҳәм елимиздиң басқа да жоқары оқыў орынлары, илимий-изертлеў институтлары ҳәм орайларынан жетекши алымлар ҳәм илимий излениўшилер өзлериниң баянатлары менен қатнасты.

Усы халықаралық илимий-әмелий конференциядан күтилип атырған тийкарғы нәтийже регионлар экономикасының инновациялық-инвестициялық тартымлылығын еле де арттырыў, аймақтағы ҳәрекет етип турған тармақларды модернизациялаў ҳәм диверсификациялаў машқалаларының шешилиўи ҳәм перспективалары бойынша илимий-әмелий жақтан усыныс ҳәм пикирлер ислеп шығыў, сондай-ақ, Өзбекстан, Туркия, Россия, Қазақстан ҳәм басқа да мәмлекетлер менен илимий байланысларды және де жақсылаў, халықаралық илимий-әмелий конференция нәтийжелерин ҳәм илимий пикир, исленбелерди республиканың тийисли министрликлерине усыныс етиўден ибарат.